Venezuela enfrentando un default

Enfrentando $3.700 miyon di pago riba debe cu ta vence den e proximo lunanan, e regimen di Nicolás Maduro ta sigui busca fondo desesperadamente, ofreciendo na e Rusonan, na prijs di baca flaco, e propiedadnan petrolero cu e Chavistanan a confisca di e companianan transnacional Mericano.

Y asina mes tin duda cu nan lo por logra di conta cu e fondonan pa evita un incumplimento di debe, asina Russ Dallen, socio y gerente di e firma Caracas Capital Markets, ta adverti den cuadro di un evento realisa diamars pasa na Miami pa Camara Venzolana – Americana y pa e Venezuelan American National Bar Association.

“Tur hunto, den e proximo dos luna, Venezuela y PDVSA mester paga como $3.700 miyon na debe cu ta vence, pero ta obvio cu nan no ta generando suficiente placa pa cubri e sumanan aki”, Dallen a declara, cu tambe lo expone e situacion di e pais Sur Americano den e proximo siman den un audiencia di Camara di Representante. E situacion aki a conduci e regimen Bolivariano na acudi na e Rusonan, ken gradualmente tabata incrementando nan participacion den e industria petrolero Venezolano.

“Nan a ofrece e Rusonan pa bende nan un participacion den PetroPiar, un operacion cu ta pertenece pa 30% na Chevron y den cual PDVSA a yega na tin un participacion di 70%, despues cu e regimen a expropia e participacion di 40% cu ConocoPhillips tabatin, y cual ainda no a ser paga”, Dallen a bisa.

Segun e agencia di noticia Reuters, PDVSA a ofrece Rosneft 10% di e proyecto, desaroya pa procesa e crudo extrapisa di e Faha Petrolifero di Orinoco y transforma esaki den crudo sintetico.E oferta “ta un señal di e situacion economico hopi duro cu e nacion Latino Americano ta enfrentando y di e influencia creciente di Moscu den e pais”, Reuters a reporta citando cinco fuente di e industria. E operacion, sin embargo, ta luci bastante problematico pa Chevron, ya cu si yega na concretisa e acuerdo, nan lo ta drentando den sociedad cu Rosneft, un empresa cu ta enfrenta sancionnan imponi pa Washington, cu ta prohibi empresa Mericano establece negoshi cu e entidad Ruso.

En cambio, e situacion ta parce un bendicion pa Rosneft. “E Rusonan ta disfrutando esaki hopi mes, pa varios motibo”, Dallen a enfatisa. “Pa cuminsa, nan no tabata invita pa participa den e licitacion durante e ‘Apertura Petrolera’ (licitacion di e sectornan di exploracion di Orinoco; red.), y awor nan ta vengando di e manera aki, y awor nan ta adkiriendo e activonan aki, cu a costa e companianan Mericano miles di miyones pa construi, y cu despues a keda confisca y cu no a keda compensa, na prijs di likidacion, pasobra awor Venezuela ta desespera buscando placa”, el a manifesta.

Pero e regimen no ta tocando exclusivamente porta di e Rusonan. Adicionalmente na e conversacionnan cu Rosneft, Venezuela tambe tabata papiando cu un banco di inversion Hapones pa trata di obtene fondo fresco, el a agrega. E regimen ta tratando di obtene linea di financiamento nobo, na momento cu e pais ta enfrenta e crisis economico mas severo di su historia moderno y dificultad pa cumpli cu e gigantesco debe externo. E bentanan di crudo, disminui na menos di un miyon bari pa dia, “ni sikiera ta suficiente pa paga e companianan cu ta produciendo e petroleo, o importa medicina y alimento, y e reservanan internacional di e pais ya ta na suelo”, Dallen a bisa.

E pais petrolero a logra paga $725 miyon na debe venci luna pasa, pero e regimen Bolivariano a duna muestra di tin problema na november caba, tempo cu nan no a logra paga nan debenan na tempo. E pago tabatin un retraso di 30 dia, pagando e suma relativamente modesto di $400 miyon na final di e periodo di gracia y incuriendo den loke e Mercado ta yama un “default tecnico”.E pago ey a keda realiza finalmente, gracias na e empresa petrolero Ruso Rosneft, cu a otorga un prestamo di $1.500 miyon, despues cu PDVSA a pone como garantia 50% di e accionnan di su refineria Mericano Citgo, un maniobra cu a lanta hopi asombro den e pasiyonan di poder na Washington. “Y e $1.500 miyonnan ey, sin embargo, ya a evaporea”, el a adverti.

http://www.bondia24.com/venesuela-enfrentando-un-default/

 

Deja un comentario